يسقط النظام الطائفي

قبل ما إحكي عن تظاهرة مبارح في بيروت ضد النظام الطائفي..بدّي قول كم كلمة:

يوم 27 شباط يوم كثير مميز بالنسبة لي ولخطيبي لأنه اليوم اللي “بعبرنا فيه” عن حبنا مثل مابيقولوا

تفكيرنا بالنسبة للمشاهد البعيد متناقض كلياً مع إنه أنا بشوف كثير ظابطين مع بعض

خطيبي إنسان متدين وبعديّ كثير مقارنة بحضرتي…لكنه علماني…مثل حضرتي

هيدا اللي العالم ماعم تفهموا للأسف

وتفكيرهم واقف عند فكرة إنه حضرتي وحضرته من طائفتين مختلفتين على إخراج القيد …

تدينه مامنعه يحب حضرتي(هع هع) صاحبة الحساسية تجاه رجال الدين اللي بسميهم بياعين بطاطا

وتدينه مامنعني حبه لأن قيمه ومبادئه ما بتتعارض مع قيمي ولا مبادئي..

بالعكس..مابعرف حدا قريب لأفكاري أكثر منه

اليوم أنا وياه أخترنا نزول الشارع مع الشباب الناس (شفنا من كل الأعمار والفئات) اللي نزلت كرمال تقول لأ للطائفية والنظام المبني عليها

صارلنا 3 سنين مع بعض وحققنا من هالنظام الفاسد …صفر..

لقينا بيت بالقوة وطلّعنا القرض بالقوة وهلّق عم نظبطه بالقوة…

أشغالنا لقيناها بالقوة…أو بالأحرى وصلنا للمقابلات بالقوة لأنه ماعنا واسطة أو للأسف واسطتنا مش كل هالقد

نزلنا كرمال نفش خلقنا…من نظام  تقبلنا أو رفضنا بجهات أو مؤسسات معينة بس حسب طائفتنا

بالمناسبة أنا وجهة نظري متوافقة مع رأي طوني هون بس نزلت ..ماحدا يسألني ليه..

يمكن لازم نبلش من محل لو شو مايكون…أنا عندي إستعداد بلّش من تحت الصفر مش الصفر بس

أخذنالنا كم صورة …:

http://www.flickr.com/photos/nights/sets/72157626158869824/